14 ივლისი 2010 21:28
ქალბატონ სელესტ ვალანდერის ვიზიტი
საქართველოს თავდაცვის სამინისტროში ამერიკის შეერთებულ შტატებსა და საქართველოს შორის თავდაცვისა და უსაფრთხოების სფეროში ორმხრივი თანამშრომლობის საკითხები განიხილეს. თავდაცვის მინისტრი ბაჩო ახალაია დღეს უკრაინის, რუსეთის და ევრაზიის საკითხებში ამერიკის თავდაცვის მდივნის თანაშემწის მოადგილეს სელესტ ვალანდერს შეხვდა. მხარეებმა ქვეყნებს შორის გაფორმებული სტრატეგიული ქარტიით გათვალისწინებული რეფორმების მიმდინარეობის შესახებ იმსჯელეს. საუბარი საერთაშორისო სამშვიდობო ოპერაციებში საქართველოს მონაწილეობას და პროფესიული სამხედრო განათლებისა და წვრთნის სისტემის ჩამოყალიბებასაც შეეხო; მხარეებმა დეტალურად განიხილეს ამერიკასა და საქართველოს შორის სამომავლო თანამშრომლობის გეგმები.
შეხვედრას შეიარაღებული ძალების გაერთიანებული შტაბის უფროსი გენერალ-მაიორი დევი ჭანკოტაძე, თავდაცვის მინისტრის მოადგილეები ნიკოლოზ ვაშაკიძე და ნოდარ ხარშილაძე, სელესტ ვალანდერის დელეგაციის წევრი პოლკოვნიკი ჯეიმს ლემპტონი, საქართველოში ამერიკის ელჩის მოადგილე კენტ ლოგსდონი, აშშ სამხედრო ატაშე საქართველოში ჯონ თურმანი, თავდაცვის სფეროში თანამშრომლობის ოფისის (Office of Defense Cooperation - ODC) წარმომადგენლები მაიორი რონ ფრანკლინი და ვიცე-პოლკოვნიკი პოლ შმიტი ესწრებოდნენ.
ამერიკის თავდაცვის მდივნის თანაშემწის მოადგილე უკვე შეხვდა ვიცე-პრემიერს გიორგი ბარამიძეს, უშიშროების საბჭოს მდივანს ეკა ტყეშელაშვილს და სახელმწიფო მინისტრს რეინტეგრაციის საკითხებში თემურ იაკობაშვილს.
სელესტ ვალანდერი საქართველოს 15 ივლისს დატოვებს.
14 ივლისი 2010 21:28
საბეჭდი ვერსია